الشكابة ومبارك كهرباء الدوحة وناس كتار – شـــــــــوكة حــــــــوت – ✍️ ياسر محمد محمود البشر
*الأستاذ ياسر محمد محمود أسمح لى بنشر هذه المادة عبر عمودكم المقرؤ (شوكة حوت) اخوك الأستاذ محمد يوسف يعقوب*
*الحمد لله الذي حرر ود مدني من كابوس الخراب ودبت العافية في جسد الجزيرة وتسري في عروق قراها دماء المودة والمحنة والكرم بعد أن جفت بفعل ايادي الظلم والطغاة والخارجين عن شرع الله والانسانية التي أكرم بها البشرية وسبحان الله الذي جعل الدنيا لا تعرف الكمال فرحها ناقص والسعد فيها مبتور ولا يكتمل كل طيب الا في دار الكمال الآخرة فرحنا وانبسطنا في حلوتنا ود العباس فرح ضجت به الشوارع وازدحم فيه الأطفال وزغردت النساء وتعالت حناجر الرجال بالتكبير والتهليل انا تابعت بعيوني وشاهدت وفرحت بس م مشيت كل اماكن الفرح لانو كان فيها فرح بالرصاص والبهجة بالذخيرة والذخيرة بتخوف وبتكتل وياريت نفرح وكل ما نفرح نزيل البنادق ونبعد الرصاص ونوقف الذخيرة لانو الذخيرة العملتو فينا ما هين*
*اها الفرح والاحتفال نقص بالهواجس لانو ضيفونا الحلوين الشرفونا باختيار ود العباس محطة بديلة لبلادهم بعد نهنيهم ونفرح بفرحهم بقولوا لينا بلدنا نضفت وراجعين هنا بجيك احساس الزعل وسط الفرح والحزن جنب السرور كيف يعني ترجعوا وكيف تمشو وانتو بقيتو مننا وفينا الشوارع تحفظ ملامحكم ومساجدنا اتملت بيكم والسوق تعود على وجوهكم شاركتونا افراحنا فازدات بيكم سرورا وكنتم عزاءا في أوقات الحزن والفقد يعني انتو بتمشو دا كلام شنو ودا مقلب شنو
نحن عرفنا بيكم ومعاكم معاني كتيرة ومناطق كتيرة كنا بنسمع بيها وجزء ما سمعنا بيه عاشينا قصص معاناتكم وفرحنا بأخبار مسراتكم ياخ نحن جونا ناس الشكابة ناس الخليفة الطيب وعائلته عمي عبدو وسيد الناس خليفة اهل جلال المهندس الزراعي عرفونا انو الطيبة معدن والاصالة كلمة كبيرة نورو جامعنا ونسونا وكلمونا بطيبة الجزيرة فعل قبل الكلام وحزنا معاهم على البوابير الوقفت والعيوش الاتنهبت والقمح الما اتحصد وعرفنا انو زول الجزيرة حافظ أرضه سرابة سرابة وتبازة تبازة ولسة منتظرنهم يرجعوا تاني من القضارف تقوم الشكابة تتحرر وتمقلبنا مقلب زي دا؟*
*هو نحن مبارك مهندس الكهرباء وأسرتو لسة منتظرنهم تاني يجو عشان تاني يمد يدو معانا في الطاقة الشمسية بعد ما وقف معانا في طاقة الموية وطاقتنا ماااااشة من جامع لجامع تقوم الجزيرة تحرر ويمش لأهلو دا كلام دا ؟ اها وشيخ محمود واسرتو بعد ما عطر معانا ليالى ربيع بالذكر وبعد ما عمر مسجد السوق بالصلاة على سيد الناس ممكن يفكر يرجع وناس الدوحة ما عندكم اي حجة أهلكم الرحيماب الانتو رحيمباب اكتر منهم قاعدين واستاذنا احمد البدري بنقول ليه يقعد في السعودية وما يجي استاذنا وحبيبنا وقدوتنا بس كمان انتو تقعدوا وتزيدو بيتوا تعمير وصيانة وكهرباء وموية وخرصانة نحن منتظرين البروف سعد النعيم تاني يجينا باسرتوا ويزيد أولادنا الناجحين نجاح تقوم الجزيرة تحرر بالله دي عملية يعملها الجيش؟ يدق المعردين ستة صفر ويخلي ناس الجزيرة يفكروا في الرجوع والجيش زاتو مضايق ضيق شديد دا ما شغل ابرة دي أزمة واب راسين وبوكلين كمان قبل ما نحتفل بالحاج عبدالله يقول ليك في فداسي جيش هو ولا بص سياحي هي اصبروا لينا شوية خلو جلحة يطلع لايف او قجة يعدل كدمولو معقولة يا جلحة تعرد بالسرعة دي وجريك يكون اسرع من كلامك هووووي يا ناس الجزيرة وضيفونا الاكارم أصبروا حبة زيدونا محنة ومودة وعلمونا انو العمل ما بقيف حتى لو طلعت من بيتك نحن تعلمنا منكم انو مهنتك سلاحك ومعاك قبل شنطتك واخلاقكم العظيمة دي زيدونا منها حبة يا محترمين يا سمحين
ياخ لسة مسجدنا ما شبع من ند عمي مصطفى ومن صوته الجميل وهو يرتاح بين صفوف المصليين بعد عناء تجريب أصناف التجارة حتى يوفر القوت الحلال ويا ناس الشكابة ايمن دا ضروري يجينا ياخ انا مع ايمن دا قفلت ملف الحلاقة حق الاولاد معقول يمش وانا اقعد اساسق بشعر الوليدات*
*مبروك تحرير الجزيرة وعقبال باقي الوطن وتحيات حب لمن مروا عبر ود العباس فنثروا ورود الوداد والحب والمودة والاحترام وترجعوا لينا بالسلامة قلوبكم مطمئنة على الوطن وعيشكم في المخازن لا تخافون عليه الا عدم إكرام الضيف ولا يهجم عليه الا طير منحتوه التصريح إقامة طيبة كطيب الذين ما زالو بيننا وترجعو بالعافية والخير يجيكم أضعاف ما فقدتو ناس كتار ووجوه خير كتيرة مرت بنا وما زالوا بيننا يضيق المقام عن ذكر الأسماء وتتواضع الكلمات دون حصركم
ود العباس مبسوطة بيكم وسعيدة برجوع بلادكم من اهل الشر وان شاء الله م تشوفوا تاني شر*
*محمد يوسف يعقوب*
*ود العباس شرق سنار*
