نغمة الهدن والتفاوض وتشكيل الحكومة .. الغرقان في الريش يتعلق – قلم ورصاصة – ✍️ نقيب /صهيب عزالدين

صدح بها ملك الطمبور عبدالقيوم الشريف قائلاً :

 

ما كان في الحسبان نتفارق ياها أقدارنا وحال الدنيا

 

وإيد القسمة إن وقعت صابت ما بتنفع في ردها منية

 

إلا الحلم البيك كان أكبر من إحساس ينصب في غنية

 

والغرقان في الريش يتعلق وريشتي أنا تبقى صدى كلماتك

 

وزي ما قال قانون نيوتن الثالث لكل فعل رد فعل لاحظنا ظهور نغمة التفاوض مقرووونة مع تقدمات الجيش ..

 

الجماعة إياهم مع أي تقدم وإنتصارات للجيش يا فكو إشاعة التفاوض يا جاهم إبليس ونقرش ليهم عودو وقال ليهم أمسكو في موضوع تشكيل الحكومة

 

هدنة وتفاوض؟؟ .. البتفاوض معاكم يكون بيلو .. بيلو ده والله زي الزول البصحى يوم الجمعة الساعة اطناشر يا دوب داير يفطر ويكوي الجلابية ويمش يلقى السروال لسه لين وينشفو .. المهم يمش الجامع يلقى الناس صلت وجاية راجعة

 

 

هسه يا الهوان ده زمن تتمرد فيهو .. لا لحقت (الضولارات) ولا الجي إكس آرات .. عليك الله بعد سفيان جا جاري بي منفوخة المتمرد ليها شنو ينفخك الدي ثيرت

 

 

هدنة وكروزرات الجيش تفحط ودااااك كبرى حنتوب .. السواقين قالو غيار الزيت الجاي في ورشة الفرقة الأولى مدني .. الشغل ده يا قحاحيط شبه فاتح وأربعة صباع للناس البتفهم في الميكانيكا

 

 

وتفاوضو على شنو ؟؟ دايرين تاني ترجعو مليشيتكم دي تستلم مقارها وتصرف شيكاتها من بنك السودان الافقرتو ده .. لااااا بعرض المصيبة الواقعين فيها انتو الأيام دي .. نقول ليكم مقولة أم الخليفة لولدها ( لا تبكي كالنساء على ملك لم تحافظ عليه كالرجال)

 

 

 

تاني شي زمان اتكركرتو جيتو جدة ووروكم انو بنتفاوض معاكم بس اتلمو لينا في المعسكرات السميناها ليكم لكن لأنكم لا تأمنونا كما لا نأمنكم برااااااكم أبيتو .. تأمنونا ونأمنكم دي ذكرتني (غائدكم) النور القبة بتاع نهايتا وما نهايتا .. هسه الزول ده والناس المعاهو خبرهم شنو مع جغم الزرق وشغل شمال مليط ده ؟؟

 

أها موضوع الزرق ده برجعنا لنص المقال التاني موضوع تشكيل الحكومة .. هسه كدي اتفقو حكومتكم دي داخلية ولا خارجية (بتكون خارجية لأنو خارجياتكم كترت) .. كدي اتفقو بتذكرنا قصة في معهد المشاة جبيت (الذي نجله ونقدسه) واحد من الطلبة زيتو طالع وجوهو معلمين اتنين واحد قال ليهو أجري والتاني قال ليهو أزحف الطالب جدع طاقيتو وقال ليهم انتو كدي اتفقو ، قالو ليهو نحنا لو اتفقنا بنضرك

 

 

اها حكومتكم دي كان خارجية والله إنتو يا الجناح السياسي للمليشيا قِدرة فول ما تقدرو تديروها وتشرفو عليها من برة لأنو لو جا أي مواطن سوداني ماري سأل قدرة الفول دي حقت منو وقالو ليهو حقت حمدوك وخالد سلك أول شي ببصق فيها وبكشحها .. انتو مواهيم ولا مستجدين سياسة والله السودان ده لو عندك طبلية إلا تجي تقيف فيها وتشغلها براك كمان جابت ليها إدارة حكومة من الخارج .. الشغل ده بالإيمو ولا كيف؟؟ .. ما كعبين انتو كعب عرقي السفنجات

 

 

أها كمان لو الحكومة داخلية ما بنحتاج نتناقش معاكم كتير لأنو أول مرة نشوف حكومة ودولة تسقط عاصمتها قبل يعلنو عنها (الزرق) ..

 

الشغلانة دي اتقدت ليكم هناك الجيش والقوات المعاهو حققو فيكم المفاجأة وما تستغربو لو سمعتو البروجي بالحرس الرئيسي للفرقة ١٦ نيالا أو ٢٠ الضعين .. الغربية دي عريقة وعلم منزوع نزعان ومافي تخلي عنها وده الفرق بين الجيش السوداني وبينكم وبين جيوش المنطقة وجيوش أربابكم وداعميكم إنو نحن عندنا تاريخ عشان كده الجيش ده كوم حجار قدر ما تنطح بتكسر قرونك بس .. يمرض ولا يموت

 

ختاماً نحن نكرم ونقدس ونعشق الجيش السوداني ليوم القيامة .. والباقي زي ما قال عمكم حماد الدندر

 

كسرة :

 

مع الوضع العملياتي المعقد للمليشيا والصنفرة الحاصلة في كل المحاور نذكر ليكم قصة المسطول دخل للدكتور ولابس ليهو فنيلة فيها خريطة السودان الدكتور سألو حاسي بالوجع وين قال ليهو تحت كسلا بشوية

 

 

هسه انتو حاسين بيهو وين؟

 

 

العزة والرفعة والمنعة لقواتنا المسلحة الباسلة